Manufahi, 19 Maiu 2025 – Komandu Polísia Nasionál Timor-Leste (PNTL) Munisípiu Manufahi hala’o Serimónia Entrega Deviza Promosaun Tranzitóriu no Promosaun Antiguidade ba membru 120, iha Kuartel Jerál PNTL Manufahi.

Serimónia importante ne’e hatudu ezisténsia kontinuada ba reforma strukturál iha sektór seguransa, ne’ebé hala’o husi Governu IX Konstitusionál, liuhusi rekoñesimentu ba dezempenhu profesionál no meritóriku membru PNTL sira.

Iha diskursu ofisiál, Ministru Juventude, Desportu, Arte no Kultura (MJDAK), Sua Exelénsia Nélio Isaac Sarmento (NIS), fó parabéns ba membru hotu sira-ne’ebé simu diviza, hodi subliña katak promosaun ne’e representa konfiansa Governu ba kapasidade no integridade institusionál PNTL nian.

“Povu sente seguru, povo sente livre, povo sente moris iha lei nia okos, bainhira instituisaun ida-ne’e hatene katak implementa lei no orden,” hateten Ministru NIS.

Ministru NIS mós subliña katak promosaun diviza ne’e la’ós recompensa simples, maibé resultado husi dedicação, sakrifísiu no servisu profesionaál ne’ebé mostra ba tempu naruk. Nia fó husi mensagem motivasaun hodi husu membru sira atu kontinua servisu ho dignidade no responsabilidade ba povu no nasaun.

“Diviza ida ne’e representa responsabilidade boot liu tan. Hakarak hatete ba imi katak imi la’o iha laran kabas, ha’u hatene imi sei kontinua fó diak liu tan,” Ministru NIS hateten.

Serimónia ne’e mak parte husi procesu reestruturasaun organizasionál, ne’ebé sei permite rekolokasaun efetiva ba membru sira ho objetivu aumenta efisiénsia operacional ba PNTL iha nivel lokal.

Iha fatin hanesan, Sub-Inspetór Xefi Jorge Monteiro, iha naran Komandu Jerál PNTL, fó agradecimento ba Governu IX Konstitusionál ne’ebé kontinua implementa polítika promosaun ho base ba meritokrátiku.

“Iha naran Komandu Jerál PNTL, ha’u fó agradesimentu boot ba Governu ida-ne’e no parabéns ba membru hotu ne’ebé hetan diviza ho responsabilidade tomak,” hateten Xefi Monteiro.

Sub-Inspetór Monteiro mós fó apreseiasaun ba prezensa Vise-Ministru Prezidénsia Konsellu Ministrus Asuntu Parlamentar, Dr. Adérito Hugo da Costa, Deputadu Antoninho Sarmento, António Verdial, Prezidente Autoridade Munisípiu Manufahi, diretór liña ministeriál sira, Konsellu Veteranus, no Asosiasaun Esposas PNTL sira-ne’ebé marka prezensa.

“Ha’u sente kontente no fó bemvindu ba serbisu sira iha Manufahi, fatin ne’ebé uluk ha’u mós hala’o knaar. Obrigadu ba susténs regular ba PNTL,” Xefi Monteiro finaliza.

#MídiaMJDAK