Dili, 8 Abril 2025 - Ministériu Juventude, Desportu, Arte no Kultura (MJDAK) hala’o enkontru konsultativu ho Federasaun Futeból Timor-Leste (FFTL) no Liga Futeból Timor-Leste (LFTL) hodi diskute preparasaun no apoiu ba realizasaun Liga Futeból Nasionál iha tinan 2025.

Enkontru ne’ebé hala’o iha Salaun Magna MJDAK, Lecidere, Dili, ne’e partisipa hosi Ministru MJDAK, Nelyo Isaac Sarmento (NIS), Sekretáriu Jerál FFTL, José Adilson de C. Ribeiro , Vise LFTL, Osorio Florindo, ekipa téknika FFTL no LFTL, Diretór Jerál Desportu, João M. Rodrigues, Diretór Nasionál Desportu Federadu, Oscar Dias Quintas, no asesór sira.

Ministru Nelyo Isaac esplika katak objetivu enkontru ne’e atu rona hanoin no proposta hosi FFTL no LFTL kona-ba preparasaun no planu orsamentál, hodi permite ba governu atu halo planu finanseiru ba realizasaun kompetisaun futeból.

"Governu iha komitmentu atu finansia US$500.000 ba liga futeból ne’e. Karik Federasaun mós bele fó kontribuisaun, liga bele komesa prepara kalendáriu no organizasaun," Ministru Nelyo Isaac hateten.

Sekretáriu Jerál FFTL, José Adilson de C. Ribeiro , konfirma katak FFTL iha komitmentu atu kontinua sustenta liga ne’e no sei fó US$200.000 atu suporta programa ne’e ba tinan ida-ne’e.

Vise LFTL, Osorio Florindo, hato’o katak liga ne’e iha ona kalendáriu no preparasaun tékniku, maibé presiza konfirmasaun finál kona-ba kontribuisaun orsamentál hosi governu no federasaun. Nia mós subliña katak liga enfrenta dezafiu infraestrutura, tanba jogu sei hala’o iha munisípiu sira no se posibel sei uza Estadiu Manatuto ba abertura liga.

Enkontru ne’e hatudu kompromisu hosi parte hotu-hotu atu garante realizasaun Liga Futeból Nasionál 2025 ho susesu, no kontribui ba dezenvolvimentu futeból iha Timor-Leste.

#MediaMJDAK