Delegasaun hasoru malu ho Vise-Ministru Saúde, José dos Reis Magno; Ministru Interiór, Francisco Guterres; no Diretór Jerál Ministériu Transporte no Komunikasaun (MTC), Constantino Perreira Soares. Enkontru sira hala’o iha respetivu ministériu sira iha Dili, foka liu ba seguransa saúde, protesaun sivíl, imigrasaun, no telekomunikasaun hodi asegura organizasaun eventu ne’e ho susesu.
Durante diskusaun kona-ba seguransa no imigrasaun, Ministériu Interiór garante katak preparasaun la’o di’ak. Forsa seguransa sira, inklui Polísia Nasionál Timor-Leste (PNTL) no ho apoiu Forsa Armada Timor-Leste (F-FDTL), preparadu atu garante seguransa iha jogu tomak. "Seguransa sei hala'o dezde momentu ne'ebé atleta sira no ofisiál sira to'o iha Timor-Leste to'o sira nia saída", afirma hosi ministru.
Ministériu Transporte no Komunikasaun (MTC) konfirma nia kompromisu hodi apoia jogu sira, partikularmente iha telekomunikasaun no transporte. Diretór Jerál Constantino Perreira Soares subliña katak foti daudaun medida sira hodi hasa’e konetividade internet no fasilita koordenasaun atendimentu ne’ebé la’o ho di’ak, liuliu iha área xave sira hanesan aeroportu no fatin desportu sira.
Vise-Ministru ba Fortalesimentu Institusionál Saúde nian, José dos Reis Magno, destaka importánsia servisu saúde nian hodi garante bem-estar atleta no ofisiál sira nian. "Ami nia prioridade maka garanti servisu médiku nesesáriu sira hotu durante jogu sira", nia afirma, hodi nota katak pesoál saúde sira sei koloka iha otél sira ne'ebé dezignadu no fatin prinsipál sira. Ministériu Saúde koordena hela ho parseiru sira, inklui Nasoins Unidas no Cruz Vermelha (CVTL), hodi hasa’e seguransa saúde durante eventu ne’e.
Hodi foti husi esperiénsia pasadu, hanesan vizita Papa Francisco nian, ministériu ne’e hatudu konfiansa iha ninia abilidade atu fó apoiu médiku nesesáriu. "Ami nia fasilidade saúde sira prontu ona, no ami nia profisionál no voluntáriu sira sei asegura kuidadu médiku ne'ebé loos durante kompetisaun tomak," tenik Magno.
Nu’udar koordenadór jerál, Sekretáriu Estadu Jorge Soares Cristovão haktuir hikas katak vizita husi Komisaun Tékniku Akompañamentu CPLP ne’e halo parte iha prosesu avaliasaun ofisiál. Komisaun ne’e sei hato’o ninia deskobrimentu ba estadu membru CPLP sira, no mós ba Ministru Estadu, Juventude, no Desportu, no Sekretariadu CPLP. Avaliasaun ne’e sei fornese atualizasaun ida kona-ba nivel preparasaun Timor-Leste nian no destaka área sira ne’ebé presiza atensaun liután.
Ho Jogu CPLP ne'ebé sei hala'o iha fulan-Jullu 2025, komisaun organizadora iha nafatin kompromisu atu finaliza arranju nesesáriu hotu-hotu hodi asegura eventu desportivu internasionál ida ne'ebé susesu no jere ho di'ak.
