Dili, 5 Maiu 2025 – Sua Exelénsia Ministru Juventude, Desportu, Arte no Kultura (MJDAK), Nélio Isaac Sarmento(NIS), ofisialmente lansa website ofisiál MJDAK nian (https://mjdac.gov.tl) ba públiku. Plataforma dijitál ne’e ho objetivu atu hametin transparénsia no fasilita públiku,atu akompaña direta informasaun ofisiál husi ministériu.

Iha ninia intervensaun, Ministru Nélio Isaac hateten, “Ida ne’e mak ita-nia website ofisiál. Ho ida ne’e, ita bele partilla informasaun no atividade ministériu nian, publika konteúdu sira husi fonte ofisiál. Husu ba diresaun hotu-hotu atu asesu website ofisiál ne’e, hodi nune’e evita informasaun no krítika ne’ebé dala barak mosu iha pájina ofisiál Facebook MJDAK nian. 

Lansamentu website ofisiál ne’e marka mós loron istóriku importante, aniversáriu akordu 5 de Maiu entre Timor-Leste, Indonézia no Portugal, ne’ebé loke dalan ba Konsulta Populár iha loron 30 fulan Agostu tinan 1999. 

Durante serimónia lansamentu, Sua Exelénsia Ministru mós despede Diretora Nasionál Patrimóniu, Logístika no Infraestrutura (DNPLI), Maria Luisa Monteiro, ne’ebé sei hahú hala’o funsaun foun iha Ministériu Transporte no Komunikasaun (MTK), liuhosi Autoridade Aviasaun Sivíl Timor-Leste, nu’udar Vogál ba Finansa konsellu administrasaun iha instituisaun refere.

Atividade lansamentu ne’e hetan partisipasaun husi Diretór Jerál Servisu Korporativu, Diretór Jerál Juventude, Xefe Gabinete SEAK, Koordenadora GCI, asesór tékniku sira no diresaun lojístika.

 Asesu ba website ofisiál MJDAK iha: https://mjdac.gov.tl

#MediaMJDAK