Nelyo Isaac Sarmento moris iha Dili, iha loron 26 fulan Marsu tinan 1973, ho orijin hosi Munisípiu Manufahi.
Knaar nu’udar Ministru Juventude, Desportu, Arte no Kultura la’ós esperiénsia foun ba Nelyo Isaac Sarmento, tanba antes ne’e, iha períodu 2018 to’o 2020, nia simu ona konfiansa lidera Sekretaria Estadu Juventude no Desportu. Antes asume kargu ne’e, iha V Governu Konstitusionál (2012-2017) ne’ebé lidera husi Primeiru-Ministru Kay Rala Xanana Gusmão, Nelyo Isaac Sarmento mós kaer knaar importante nu’udar Sekretáriu Estadu Komunikasaun Sosiál (SECOMS). Durante nia lideransa iha SECOMS, nia konsege estabelese Ajénsia Notisioza Timor-Leste, TATOLI.IP, ne’ebé sai fonte ofisiál ba informasaun Estadu nian.
Nelyo Isaac Sarmento hahú nia karreira profisionál nu’udar jornalista iha Surya Citra Televisi (SCTV) iha tempu Indonézia. Hafoin Timor-Leste restaura ninia independénsia, nia kontinua ho profisaun jornalista hodi servisu hamutuk ho Misaun Nasoins Unidas iha Timor-Leste (UNTAET) iha Televizaun Timor-Leste (TVTL), ho kargu ikus nu’udar Xefe Redasaun Radio Televizaun Timor-Leste (RTTL). Nia mós iha esperiénsia servisu ho media internasionál, inklui servisu nu’udar stringer ba Reuters (Ajénsia Notisioza Reinu Unidu).
Iha área desportu, Nelyo Isaac Sarmento ativamente envolve iha Federasaun Futebol de Timor-Leste (FFTL) nu’udar Sekretáriu Jerál iha lideransa Francisco Kalbuady Lay nu’udar Prezidente no Francisco Jeronimo nu’udar Vise-Prezidente FFTL nian. Iha ninia knaar nu’udar Sekretáriu Jerál FFTL, nia responsabiliza no jere atividade tomak federasaun nian no hala’o komunikasaun direta ho ASEAN Football Federation (AFF), Asian Football Confederation (AFC) no Federation Internationale Football Association (FIFA).
Jorge Soares Cristovão moris iha Dili, iha loron 30 fulan Abril tinan 1986.
Antes asume kargu nu’udar membru IX Governu Konstitusionál, Jorge Soares Cristovão, kuadru polítiku husi Partidu Congresso Nacional da Reconstrução Timorense (CNRT), iha ona esperiénsia signifikativu iha servisu governasaun, liuliu iha kargu xefe gabinete no asesór.
Nia kaer kargu Xefe Gabinete ba Sekretáriu Estadu Pekuária husi Agostu 2012 to’o Juñu 2015.
Antes hetan konfiansa husi Primeiru Ministru Kay Rala Xanana Gusmão hodi asume kargu Sekretáriu Estadu, Jorge Soares Cristovão serbisu nu’udar Asesór Lojístika no Patrimóniu ba Prezidente Repúblika Demokrátika Timor-Leste husi 20 Maiu 2022 to’o 31 Juñu 2023.
Antes ne’e, nia mós kaer kargu asesór iha Ministériu da Agricultura e Pescas, iha períodu Agostu 2018 to’o Juñu 2020.
Aleinde ne’e, entre Juñu 2015 to’o Setembru 2017, Jorge Soares Cristovão asume responsabilidade nu’udar Koordenadór da Unidade de Coordenação Interorgânica do Ministro do Estado Coordenador de Assuntos da Administração do Estado da Justiça.
Nia mós serbisu nu’udar Koordenadór Lojístiku no Transporte ba Kandidatu Prezidente Repúblika Dr. José Ramos Horta iha períodu Janeiru 2022 – Maiu 2022.
Atualmente, Jorge Soares Cristovão mós lidera Organizasaun Juventude Partidu CNRT (OJP) nu’udar Prezidente.
MINISTÉRIO DA JUVENTUDE, DESPORTU, ARTE E CULTURA
SECRÉTARIO ESTADO ARTE E CULTURA
