Manatuto,  07 Novembru 2026, GIK--- Xefi Gabinete Ministerio Juventude Desportu Arte no Kultura (MJDAK),  Egas Barros Guterres Godinho abertura ofisial atividades ba Loron Nasional Juventude (LNJ) 12 Novembru 2026 nian iha Munisipiu Manatuto.

Xefi Gabinete MJDAK, Egas Barros Guterres Godinho relembra,  loron nasional juventude ne'ebe selebra ba dala 21 no komemora loron masakre santa kruz ba dala 35, ne'ebe akontese bo'ot lori joven barak, feto no mane husik hela familia no ohin la hamutuk ho ita, no ohin ita hotu goja ukun aan ida ne'e.

Loron 12 Novembru 1991,  importante tebes no signifikadu tebes ba joven sira atu hanoin hikas, ho sakrifisiu bo'ot husi foinsae sira Iha tinan 35 ba kotuk, sira husik hela sira nia vida tomak atu bele goja. Tanba ne'e mak ohin loron bele hamutuk hodi hamrik Iha nasaun RDTL Ida nee.

Egas hatutan,  importante tebes ba joven sira, importante mos ba sobrevivente sira, iha ne'eba sira husik hela uma, husi hela toos, husik hela servisu, husik familia, husik Inan-aman, husik oan sira,ohin loron balun sai faluk, balun mos laiha laen no balun laiha feen, balun moris mai lahetan inan-aman tanba deit sira hakarak nasaun ne'e sai livre no independente.

“Ohin, ita hamrik hamutuk iha fatin ida ne'e hodi selebra ba sira nia terus, selebra sira nia raan fakar, ohin ita viva, mais uluk sira viva hakarak Ukun Rasik An (URA), “ Egas fo hanoin hodi, “Herois Foinsae sira nia korajen mak ohin loron ita bele eskola, bele koalia livre, hakilar malu, bele lao iha demokrasia nia laran, ohin joven sira ladun tau importansia ba tempu ida ne'e, ho deit laiha sosializasaun ka la fo informasaun”.

Pergunta bo'ot ida mai ita mak ohin loron ita foinsae sei halo saida ba nasaun ida ne'e, atu halo saida ba ita nia rai, munisipiu no postu Administrativu sira, liga mos sakrifisiu bo'ot ne'ebe ita nia maun alin sira, inan-aman sira, joven sira uluk feto ka mane la tauk bala musan.

Tan ne'e,  Juventude ohin loron la presiza foti kilat, joven sira ohin la presiza hakilar no baku malu, joven sira ohin loron mak presiza matenek, eskola, buka dezemvolve kapasita  aan no lori pais ne'e ba oin. MJDAK Iha mos programa rutina Ida no tinan-tinam sempre fo apoiu hodi komemora loron importante ne'e, Laos atu mai komemora deit.

Iha misaun ida atu haklaken nafatin memoria ne'ebe ita nia joven sira uluk hala'o mai ita atu nune'e ita bele hamrik metin hodi liberta rai Ida ne'e ba oin.

Tanba ne'e MJDAK hamutuk diresaun Jeral Juventude, fungsionariu tomak, atu nune'e bele haklaken memoria moruk ne'ebe nakfila ba memoria midar, no lori joven sira ba dalan diak nian, hodi dezemvolve nasaun RDTL ne'e ho diak liu tan ne'ebe nakonu ho prosperiedade.

Ho prinsipiu ida katak luta ida ne'e, atu joven sira bele hamrik metin no firme hodi dezemvolve ka kapasita Aan ho diak liu tan.

Partisipante Sira mai husi Diretur Jeral Juventude, Diretur Nasional Dezemvolvimentu Juventude, Presidente Autoridade Munisipiu Manatuto, Komandante PNTL Munisipiu Manatuto, Veterano Manatuto, Amo Paroku, Administrador Postu Administrativu Ne'en Munisipiu Manatuto nian, Xefe Suku Sira nomos Komunidade tomak. #MediaMjdak#