MANATUTU, 11 Novembru 2026, GIK---Identidade Timor Oan lolos mak foinsae sira tenke hatene istoria prosesu luta naruk ba Ukun Rasik An (URA) ho disiplina oinsa hatudu sentimentu solidaridade ba malu iha asaun konkreta.

Diretur Jeral Juventude, Ministeriu Juventude Desportu Arte no Kultura, Mario Tilman apela ba foinsae sira iha ambitu seminariu konaba selebrasaun Masakre Santa Crus 1991 ba da-35 no loron Nasional Juventude Timor Leste ba da-21 iha Kapital Manatutu.

Mario Tilman ne’ebe akompanha direta husi Presidenti Comite 12 Novembru, Grigorio Saldanha ne’e, ensera atividades seminariu iha  Salaun Parokia Santo Antônio Manatuto, hateten, “Hanoin katak ita nia identidade ne’e mak primeiru ita nia lian, kultura no historia sira.  Tanba ne’e atu hatudu ita nia identidade lolos nu’udar timor oan tenki hatene historia no hatudu ho asaun liu husi la soe lixu arbiru no fo solidariedade ba malu iha situasaun difisil nia laran hodi kontribui ba malu.  Ida ne’e mak identidade timor oan nian”.

Tema selebrasaun Loron Nasionál Juventude tinan ida ne’e katak, ”Ho Espiritu 12 Novembru Nian Lori Ita Hamutuk ba Harii Páz no Sai Autór ba Dezenvolvimentu Sustentavél”, hodi  ezije joven sira nia responsabilidade oinsá mak kontinua valoriza espiritu Heroi sira nian hodi hatudu solidariedade no domin ba malu iha prosesu konstrusaun estadu,”dehan Mario Tilman.

Mario mós hato’o agradese wa’in tebes ba iha Parokia Manatuto nia disponibilidade oferese fatinhodi realiza semnináriu durante loron rua no mós agradese ba ekipa Komisaun Organizadóra hamutuk ho Juventude Manatuto oan sira nia espiritu vontade hodi partisipa iha atividade ne’e inklui fonsa’e sira ne’ebé reprezenta Timor-Leste iha atividade ASEAN hodi mai partilla informasaun husi benesiu adere ba ASEAN nian ne’ebé durante sira partisipa nune’e enkoraja nafatin foinsa’e sira atu kapasita aan hodi hasa’e kuñesimentu iha lian ingles atu bele aproveita oportunidade sira ne’ebé governu oferese. Partisipa iha atividade ne’e mai husi MJDAK hamutuk ho reprezentante foinsa’e ASEAN no juventude, estudante  no foinsa’e sira Mestri/a sira no mós autoridade sira.

ASEAN

Antes ne’e, Tersa (10/11), Mario Tilman nudar orador iha seminariu, hateten,  objetivu husi atividade ne’e oinsa joven sira ne’ebé ba partisipa ona atividade sira iha  sorumutu ASEAN ne’ebé reprezenta timor ba hetan kuñesimentu ne’ebé sira iha fila mai partillha fila fali ba iha juventude sira seluk liu-liu kona-ba Seguransa Estrada, Capacity Building, Regilence Dijital, tanba ohin loron ita tama ona era dijital ho ida ne’e mak joven sira importante mós hatene vantajen no desvantajen husi dijital ne’e rasik

“Objetivu ba atividade loron ohin ne’e maka oinsa joven sira ne’ebé ba partisipa ona atividade sira iha  sorumutu ASEAN ne’ebé reprezenta timor ba hetan kuñesimentu ne’ebé sira iha fila mai partillha fila fali ba iha juventude sira seluk liu-liu kona-ba Seguransa Estrada, Capacity Building, Regilence Dijital, tanba ohin loron ita tama ona era dijital ho ida ne’e mak joven sira importante mós hatene vantajen no desvantajen husi dijital ne’e rasik. Iha sorin seluk ita mos sei diskute kona-ba SSEAYP ne’ebé eventu ida ne’e halo selesaun husi nasaun ASEAN husi parseiru dezenvolvimentu Japaun ne’ebé kada tinan sempre halo no ita Timor-Leste mós partisipa, inklui ohin loron mós sei partilla mós kona-ba patritízmu no nasionalízmu tanba ita hatene katak Loron Nasionál Juventude ne’e inspira husi Masakre Santa Kruz ida ne’e mak komité 12 sei fahe ba joven sira atu bele komunga valor ne’ebé uluk heroi sira sakrifika ona iha tempu ne’ebá,”dehan Mario Tilman.

Diretór Jerál ne’e mós rekoñese preukupasaun husi sobrevivente sira maibé governu liu husi Ministériu Juventude, Desportu Arte no Kultura nafatin iha espforsu para oinsa atu prepara kondisaun ba joven sira hodi hakat ba merkadu traballu no mós subliña katak asuntu juventude ne’e la’os responsavél ministériu nian  mesak maibé ema hotu nian.

Mario Tilman mós enkoraja joven sira atu aproveita oportunidade sira hodi aprende hodi hakle’an liutan kuñesimentu tanba mundu ohin loron presiza hatene situasaun global tanba joven sira mak sai hanesan jerasaun kontinuadór hodi hametin estadu ida ne’e hodi dezenvolve Timor-Leste ba oin. Enkuantu atividade ne’ebé reprezenta foinsa’e timor oan sira ba partisipa iha nasaun ASEAN mak hanesan, Ship for Southeast Asian and Japanese Youth Program (SSEAYP), iha nasaun Tailandia ne’ebé aprezenta husi Carlos no Alzira, Carlito no Carminda hala’o iha nasaun Filipina kona-ba Rejilensia Dijital, Pureza  ho Joanito iha nasaun China aprezenta kona-ba Brigde of the Future Capacity Bulding, no Luis aprezenta kona-ba Road Safaty ka Seguransa Estrada ne’ebé hala’o iha nasaun Tailandia. Partisipa iha atividade semináriu ne’e mai husi MJDAK, MAE CNJTL, CVTL, PNTL, hamutuk ho foinsa’e sira husi eskola pre-sekundaria Munisipiu Manatuto inklui Mestri/a sira Autoridade lokal Inan Aman no reprezentante juventude husi Postu Administrativu sira iha Munisipiu Manatuto. #MédiaMjdak#